Byw ym Myd Barbie…Y myfyriwr dylunio Emily Bates ar greu Byd Barbie

Ar ôl graddio o MA Cynllunio ar gyfer Perfformio yn 2017 fel myfyriwr a lwyddodd i gyrraedd rownd derfynol gwobr Linbury, treuliodd Emily rai blynyddoedd yn gweithio fel gwneuthurwr modelau a chynorthwyydd dylunio yn y theatr cyn dilyn ei gyrfa ddylunio ei hun. Yna bu'n gweithio ym myd opera, yn dylunio tri chynhyrchiad ar gyfer Opera Cenedlaethol Denmarc cyn symud ymlaen i weithio ym myd ffilmiau yn 2019. Un o'i swyddi cyntaf oedd prosiect animeiddio 'stop-motion' o'r enw The House i Netflix.

Roeddwn yn gweithio ar brosiect arall yn Stiwdios Warner Bros pan oedd y gwaith rhag-gynhyrchu Barbie yn dechrau, ac roedd eu swyddfeydd gyferbyn â’r maes parcio. Roedd yn fis Ionawr oer a llwm ac roedd gwawr binc bryfoclyd yn pelydru o’r ffenestri a oedd yn edrych mor ddeniadol a hwyliog.

Mae modelau bychain ar gyfer ffilmiau yn gymharol brin erbyn hyn oherwydd y defnyddio o CGI a sgriniau glas.  Dim ond y ddwy ohonom oedd yn Adran Gelf Modelau Bychain yn cynhyrchu darluniau ar gyfer gweithdy o 15 o fodelwyr a pheintwyr modelau bychain – pob un ohonynt yn aruthrol o dalentog ac yn aruthrol o gyflym ar ôl i chi fynd â darlun iddynt.

Fe wnaethom greu darluniau ar gyfer pum graddfa 1:18 ar wahân (18 x yn llai na bywyd go iawn) o fodelau bychain lliw, a oedd yn cael eu sganio a’u defnyddio yn y lluniau cyfansawdd terfynol o’r byd, ochr yn ochr â fframiau gwifren VFX.

Bob tro y mae Barbie yn edrych ar draws Byd Barbie o’i thŷ breuddwyd, blaendir y lluniau hyn yw ein modelau bychain o’r trogylchoedd swbwrbaidd gyda’r set maint llawn yn y blaen a’r VFX yn y cefndir.

Os byddwch yn gwylio fideos tu ôl i’r llenni o’r Crynhoad Pensaernïol, fe welwch fod y tirluniau o’r mynyddoedd wedi’u paentio â llaw. Roedden nhw’n anhygoel o’u gweld go iawn ac roedd ganddynt yr un ymdeimlad â chefndiroedd theatrig wedi’u peintio â llaw.

Fe wnaethom hefyd greu modelau bychain ar gyfer y llun o dŷ Weird Barbie pan mae Margot Robbie yn dringo’r grisiau’n wastad-droed, a model bychan o’r tirlun anialwch yn ogystal â char corvette pinc graddfa 1:18!

Mae’r adeiladau ar hyd y traeth yn y lluniau llydan o’r traeth yn fodelau bychain hefyd, yn ogystal â’r adeiladau yn y cefndir pan mae Barbie yn codi ei llaw wrth yrru i’r traeth yn yr olygfa agoriadol.

Roeddwn yn treulio fy nyddiau yn astudio celf a chyfeiriadau’r cysyniad cychwynnol, yn treulio amser ar y setiau maint llawn ac yna’n darlunio’r fersiynau bychain swbwrbaidd gwahanol o’r dyluniadau pennawd sefydledig ar yr un thema er mwyn poblogi’r rhan breswyl o Fyd Barbie, adeiladau blaen siopau a’r promenâd glan y môr.

Fe wnaethom dreulio llawer o amser yn casglu gwybodaeth gan y cyfarwyddwyr celf amrywiol a oedd yn gweithio ar y ffilm er mwyn i ni allu creu modelau bychain o’u darluniau. Er enghraifft, adeiladwyd tŷ Weird Barbie mewn maint llawn hefyd ar gyfer ffilmio gyda’r actorion, felly fe wnaethom adeiladu union gopi graddfa 1:9 o’r tŷ hwnnw gyda’r tirlun amgylchynol ar gyfer yr olygfa sefydlu.

Cawsom lawer o sgyrsiau gyda’r adrannau Graffeg a’r Addurnwyr Setiau er mwyn cael dimensiynau’r propiau maint llawn a’u darlunio er mwyn gallu eu hargraffu mewn 3d a’u peintio’n fanwl gywir fel modelau bychain - fe wnaethom hyd yn oed greu’r blychau llythyrau adar a’r gwelyau haul ar raddfa 1:18!

Roedd yr adran Addurnwyr Setiau yn adran hwyliog iawn oherwydd roedd ganddynt lawer o dai breuddwyd o archif Mattel yno er mwyn gallu cyfeirio atynt, yn ogystal â samplau anhygoel o’r llenni gliter a rhubanau ar gyfer yr olygfa ddawns â choreograffi a ffabrigau dodrefnu hyfryd.

Roedd yn un o fy hoff swyddi rwyf wedi’u cael hyd yma, ac rwy’n teimlo’n lwcus iawn fy mod wedi gweithio ar rywbeth sydd wedi dod â llawer o bobl ynghyd a gwneud iddynt chwerthin. Roedden ni i gyd yn gwybod ei fod yn mynd i fod yn boblogaidd pan oedden ni’n gweithio arno – roeddem yn rholio chwerthin wrth weld rhai o’r lluniau cychwynnol – ond mae llwyddiant y ffilm yn wallgof.