Hafan
A - Z o gyrsiau
MA Cynllunio ar gyfer Perfformio

MA Cynllunio ar gyfer Perfformio

Dyfarniad:
MA Cynllunio ar gyfer Perfformio
Corff dyfarnu:
Prifysgol De Cymru
Lleoliad astudio:
Caerdydd (CBCDC, Stiwdios Llanisien a’r  Hen Lyfrgell)
Dyddiad dechrau:
21 Medi 2025
Hyd:
2 flynedd llawn amser
Cod y cwrs:
712F – UCAS Conservatoires

Cyflwyniad

Cyfle i wella eich arbenigedd gyda'n cwrs sy'n cynnig hyfforddiant arbenigol a chyfleoedd i ddylunio amgylcheddau perfformio, gosodiadau, cymeriadau a setiau ar gyfer cyfres o berfformiadau cyhoeddus byw a phrofiadau trochi.

Sut i ymgeisio

Trosolwg o’r cwrs

Dewch â'ch dyluniadau creadigol yn fyw gyda'n cwrs sy'n archwilio dulliau dylunio traddodiadol ar gyfer cymeriadau a setiau ar draws theatr, digwyddiadau, gosodiadau, arddangosfa, ffilm a theledu.

Byddwch yn ymchwilio i fodelu digidol a ffisegol, lluniadu cymeriadau a chreu byrddau stori, dan arweiniad tiwtoriaid arbenigol sy’n gweithredu ar frig eu maes.

Yn ein hamgylchedd dysgu diogel a hudolus, cewch gyfle i ddatblygu’rr holl sgiliau ymarferol a chreadigol y bydd eu hangen arnoch i roi hwb i’ch gyrfa yn y diwydiant.

Mae cydweithio wrth wraidd y cwrs hwn. Yn eich lleoliadau yng Ngholeg Brenhinol Cerdd a Drama Cymru neu ar y rhai gyda’n partneriaid yn y diwydiant, byddwch yn dysgu am wahanol ddisgyblaethau creadigol ac yn cael blas go iawn ar sut beth yw bod yn aelod o dîm cymorth cynhyrchu – y cyfan i'ch paratoi ar gyfer bywyd ar ôl graddio.

Daw'r cwrs i ben gydag arddangosfa gyhoeddus o waith eich carfan yng Nghaerdydd ac yna am bedwar diwrnod ar South Bank yn Llundain, sy'n cynnwys noson diwydiant ar gyfer cynulleidfa o ddarpar gyflogwyr.

Mae ein graddedigion Dylunio ar gyfer Perfformiadau wedi cyrraedd rownd derfynol Gwobr Linbury yn gyson ac wedi mynd ymlaen i rolau fel dylunwyr ar ddechrau eu gyrfa mewn cwmnïau blaenllaw ledled y Deyrnas Unedig.

Pam astudio’r cwrs hwn?

Ar y cwrs hwn gyda hyfforddiant ymarferol yn ganolog iddo, byddwch yn datblygu ac yn cymhwyso eich gwybodaeth a’ch sgiliau presennol i faes astudio arbenigol uwch ar lefel broffesiynol.
Drwy amrywiaeth o brosiectau a gwaith dosbarth, byddwch yn meithrin dealltwriaeth gynhwysfawr o egwyddorion damcaniaethol ac ymarferol dylunio ar gyfer theatr, ffilm a theledu – gan eich gwneud yn hynod ddymunol i gyflogwyr.
Mae ein staff amser llawn a’r darlithwyr sy’n ymweld i gyd yn ymarferwyr sy’n dal i weithio mewn diwydiant, gyda phroffiliau cenedlaethol a rhyngwladol. Maent yn dod â’r arferion gorau diweddaraf i’ch hyfforddiant.
Fel rhan o’n cwmni theatr mewnol, gallwch ennill profiad yn y byd go iawn drwy gydol y cwrs a chael dealltwriaeth ddofn o sut beth yw gweithio mewn amgylchedd perfformio byw. Yn dibynnu ar eich arbenigedd, byddwch yn cael cyfle i greu modelau cymeriad ffisegol neu ddigidol, lluniadau/dyluniadau cymeriad neu fyrddau stori ar gyfer cynyrchiadau yn y Coleg neu’n allanol.
Byddwch hefyd yn cael cyfle i sicrhau lleoliadau gyda rhai o’r prif gwmnïau cynhyrchu, fel Bad Wolf, BBC Cymru ac Opera Cenedlaethol Cymru. Mae ein hadran cynhyrchu a dylunio hefyd yn cynnig lleoliadau gyda chwmnïau theatr ac opera blaenllaw ledled y Deyrnas Unedig.
Rydym yn arwain y ffordd ym maes technoleg theatr o’r radd flaenaf, a bydd gennych fynediad at ein holl gyfleusterau, fel ein mannau stiwdio dylunio, gweithdai propiau/siop paentio, stiwdio CAD ddynodedig, ystafelloedd golygu a gweithdai celf golygfeydd ac adeiladu ar raddfa fawr.
Mae’r ffaith bod y garfan yn fach a bod lefel uchel o gymorth gan staff yn golygu eich bod chi'n dysgu mewn amgylchedd gwaith diogel sy’n eich meithrin.
Cynhelir cyflwyniadau dosbarth meistr drwy gydol y cwrs, gan ymarferwyr rhyngwladol blaenllaw. Wedi eu cynllunio i ategu anghenion astudio arbenigol unigol, mae'r dosbarthiadau hyn yn eich galluogi i ddatblygu gwerthfawrogiad cynhwysfawr o ragoriaeth, ymarfer amlddisgyblaethol a chydweithio ar berfformiadau.
Byddwch yn cymryd rhan mewn ymweliadau wedi eu trefnu â chwmnïau theatr lleol, gan gynnig cipolwg ychwanegol ar y diwydiant wrth ei waith. Pan fydd cynyrchiadau mawr yn ymweld â Chaerdydd, byddwn yn ceisio trefnu ymweliadau a threfnu taith neu sgwrs ar gyfer eich carfan.

Gwybodaeth arall am y cwrs

'Mae gwaith adeiladu golygfeydd yn ffynnu ochr yn ochr â thwf y maes cynhyrchu ffilm a theledu yng Nghymru. Mae’n bleser gennym gefnogi’r Coleg i hyfforddi’r genhedlaeth nesaf o ymarferwyr i ymgymryd â swyddi newydd yn y diwydiant.'
Hannah RaybouldRheolwr gweithrediadau Bad Wolf

Gwybod mwy am astudio cynllunio yn CBCDC

Balance

Mae Balance yn arddangos gwaith 40 o fyfyrwyr cynllunio a rheoli llwyfan sy’n graddio, ac yn cynnwys cynlluniau a grëwyd dros y ddwy flynedd ddiwethaf ar gyfer cynyrchiadau, prosiectau a ffilmiau a wnaed yn y Coleg.