Gwneud gwahaniaeth trwy berfformip: creu actorion fel artistiaid

Gan adlewyrchu’r hyfforddiant drama sy’n grymuso myfyrwyr i adael y Coleg yn barod ar gyfer diwydiant ac i gofleidio drama heriol ac anodd, gwnaeth Kasper Hilton-Hille ei ymddangosiad cyntaf yn syth ar ôl graddio eleni.

Roedd yn serennu gyferbyn â Niamh Cusack yn nrama ddinistriol, dywyll a doniol drasig Polly Stenham ‘That Face’ am salwch meddwl a dibyniaeth.

Galwyd ei berfformiad yn ‘syfrdanol a llawn ing’ gan y Guardian ac mae wedi ennill enwebiad Offie iddo fel y newydd-ddyfodiad gorau. Cyhoeddir yr enillydd ym mis Chwefror 2024.

Yn ennill gwobr Stage Debut am ei ‘pherfformiad hudolus a dewr’ yn ‘I, Joan’, mae Isobel Thom, a raddiodd yn 2022 ac sy’n chwarae rhan Joan, yn rhoi llais i stori cwiar a gwrthryfel yn y stori arloesol a heriol hon.

Gan ddod â stori actio CBCDC yn gylch cyfan, cyflwynwyd ei gwobr iddi gan un arall o raddedigion actio’r Coleg, Callum Scott Howells, a wnaeth ei ymddangosiad teledu cyntaf a gwobrwyedig yn nrama ddadleuol a phryfoclyd Channel 4 am Aids ‘It’s a Sin’, a ffilmiodd tra ei fod dal yn y Coleg.

Ysgogwyd Rakie Ayola, sydd hefyd yn raddedig o’r Coleg, i rannu ei safbwyntiau ar instagram pan welodd Izzy fel Joan: ‘Mae rhwyddineb corfforol ac ieithyddol, cyfaredd siriol, bwrlwm dengar a dewrder emosiynol Izzy yn gwneud i mi dalu sylw a meddwl, dyna berfformiad Coleg Brenhinol Cerdd a Drama Cymru. Rhaid bod hwn yn berfformiad Coleg Brenhinol Cerdd a Drama Cymru.’

Gyda’i hoffter o ddod o hyd i ffyrdd newydd o adrodd straeon, mae’r actor a’r gantores-gyfansoddwraig Anjana Vasan wedi creu argraff fawr ar lwyfan a sgrin ers iddi raddio yn 2012. Gwnaeth ei rôl yng nghomedi ddu amharchus ac anarchaidd Channel 4 ‘We are Lady Parts’, am fand pync o fenywod Moslimaidd yn unig sy’n gwrthod cydymffurfio, ennill gwobr y Gymdeithas Deledu Frenhinol iddi am y Perfformiad Comedi Gorau, yn ogystal ag enwebiad BAFTA. 

Mae’n disgrifio’r gyfres fel un sy’n ‘cofleidio eich hynodrwydd i greu celfyddyd ar eich telerau eich hun’. 

Yn 2019 enwebwyd Anjana am Wobr Theatr Evening Standard am yr Actores Orau am ei pherfformiad fel Niru (Nora yn y gwreiddiol) yng ngwneuthuriad newydd a beiddgar y Lyric Hammersmith o ‘A Doll’s House’. 

Wedi’i addasu gan Tanika Gupta i leoliad Indiaidd, agorodd y cynhyrchiad newydd hwn y drws i archwilio deinameg ychwanegol hil yn ogystal â phŵer a phatriarchaeth. 

Mae Anjana bellach ar glawr rhifyn Bloomsbury 2023 o’r ddrama. 

Gan ddod â ni i’r presennol, yn ogystal â gwobr Olivier am yr Actores Orau mewn Rôl Gefnogol – yr unigolyn cyntaf o Singapôr i ennill y wobr - mae Anjana newydd ennill Gwobr Evening Standard ar y cyd am ei rôl fel Stella yn ‘A Streetcar named Desire’ ochr yn ochr â Paul Mescal a Patsy Ferran, y mae hi’n rhannu’r wobr â hwy.

Ac wrth gwrs, nid dim ond ar y llwyfan y gallwch chi weld ein graddedigion. O Netflix i’r sgrin fawr, maent yn amlwg iawn...

Mae graddedigion diweddar sydd i’w gweld ar y sgrin yn cynnwys ymddangosiad teledu cyntaf Ayo Adegun fel un o’r prif actorion yn y dilyniant John Wick, ‘The Continental’, a’i ymddangosiad cyntaf yn y ffilm gyda’i gyd-raddedig Jerome Lance yn ‘The Hunger Games: The Ballad of Songbirds and Snakes’.

Roedd Tom Victor, a raddiodd yn 2022, yn un o’r prif actorion yn y ffilm indie boblogaidd ‘Consent’ ac ymddangosodd hefyd yn y gyfres deledu fer ‘Mary and George’ gyda Julianne Moore. Mae ei gyd gyn-fyfyrwyr 2022, Tegan Farrelly, wedi bod yn ‘The Diplomat’ ar Netflix,

Mae Lauren Morais, a raddiodd yn 2023, newydd orffen saethu ‘The Red Night’ ar gyfer ITV a chadwch lygad am Campbell Wallace fel Ringo Starr yn ‘The Midas Man’ sy’n sôn am Brian Epstein, a ffilmiodd tra ei fod dal yn y Coleg.