MMus Arwain Band Pres

Datblygwch eich dealltwriaeth o arwain gyda’n cwrs meistr a fydd yn rhoi’r holl wybodaeth a phrofiad angenrheidiol i chi ffynnu mewn diwydiant celfyddydol sy’n newid drwy’r amser.

Yma, byddwch yn mynd â’ch galluoedd i lefel uwch lle caiff medrusrwydd technegol a chelfyddyd gerddorol eu cyfuno, gan eich galluogi i ymgymryd ag unrhyw rôl arwain bandiau pres yn hyderus.

Mewn cymysgedd o wersi un i un a dosbarthiadau grŵp, byddwch yn hyfforddi gyda rhai o arweinwyr gorau’r diwydiant mewn dinas sydd â rhwydwaith ffyniannus o fandiau pres lleol. Drwy gydol eich cwrs, byddwch yn cyd-dynnu â gweithwyr proffesiynol yn eu meysydd, o’ch tiwtoriaid a’r rhestr ryngwladol o artistiaid sy’n ymweld i’r mentor arbenigol a fydd yn eich helpu i lunio eich gwaith prosiect.

Fel rhan o’ch cwrs, byddwch yn cael cyfleoedd i greu a churadu eich prosiectau perfformio eich hun. Gallwch hefyd arwain perfformiadau myfyrwyr sy’n hyrwyddo eu hunain ac ensembles, ymarferion a chynyrchiadau uniongyrchol y Coleg. Byddwch yn cael cyfle i wylio a rhyngweithio ag arweinwyr mewn lleoliadau proffesiynol hefyd.

Gyda strwythur hyblyg ein cwrs, gallwch deilwra eich astudiaethau i gyd-fynd â’ch uchelgais o ran gyrfa. Rydym hefyd yn cynnig detholiad o gymorth datblygu proffesiynol, yn ogystal â dosbarthiadau darllen sgoriau, hyfforddiant clywedol ac astudiaethau repertoire ehangach, i roi sylfaen gadarn i chi ar gyfer gyrfa lwyddiannus a pharhaol fel arweinydd.

• Mae ein rhestr drawiadol o diwtoriaid yn cynnwys unawdwyr offerynnol adnabyddus a cherddorion siambr, hyfforddwyr nodedig, cyfansoddwyr blaenllaw, arweinwyr ac artistiaid creadigol mewn amrywiaeth o genres – yn ogystal â’r prif chwaraewyr mewn ensembles a cherddorfeydd mawr. Maent yn eich mentora yn ogystal â chynnig cyfleoedd rhwydweithio ac addysg o’r radd flaenaf i chi.
• Nid yw ein rhaglen astudio yr un fath i bawb, sy’n golygu y gallwch lunio eich modiwlau craidd i gyfateb i’ch sgiliau a’ch uchelgeisiau. Gyda rhai modiwlau, byddwch yn cael rhywfaint o hyblygrwydd o ran fformat yr asesu, er mwyn i chi allu profi eich gwybodaeth mewn ffordd sy’n addas i chi.
• Byddwch yn cael sesiynau dosbarthiadau meistr ychwanegol gyda’r arweinwyr gwadd, lle gallwch gymryd rhan neu arsylwi, yn dibynnu ar ffocws y sesiwn.
• Rydym wedi ffurfio partneriaeth â sefydliadau celfyddydol enwog yma a thramor, sy’n golygu y byddwch yn gallu datblygu rhwydwaith o gysylltiadau yn y diwydiant ac arsylwi ar arweinwyr mewn lleoliadau proffesiynol – fel ymarfer gyda Cherddorfa a Chorws Cenedlaethol Cymreig y BBC, a cherddorfa Opera Cenedlaethol Cymru. Gallwch hefyd arsylwi ar gerddorfeydd a chorau sy'n ymweld fel rhan o Gyfres o Gyngherddau Rhyngwladol Neuadd Dewi Sant.
• Yn ystod eich cwrs, byddwch hefyd yn creu ac yn curadu eich prosiectau perfformio eich hun, sy’n eich galluogi i gynnal ymchwil manylach i feysydd sy’n cyd-fynd â’ch diddordebau, eich sgiliau a’ch nodau gyrfa.
• Byddwch yn cael llawer o hyfforddiant un i un, ond byddwch hefyd yn cael digon o gyfle i gydweithio â’ch cyd-fyfyrwyr arwain a’r rheini sy’n astudio ar ein cyrsiau drama hefyd. Nid yn unig mae’n rhoi cyfle i chi greu gwaith newydd cyffrous, ond mae hefyd yn eich galluogi i ffurfio partneriaethau creadigol a fydd yn para ymhell ar ôl i chi raddio.
• Pryd bynnag y bydd yr amserlen yn caniatáu, byddwch hefyd yn cael eich gwahodd i ymarferion ein band pres i baratoi ar gyfer cyngherddau – gan arwain perfformiadau o waith ar y rhaglen yn aml.
• Mae Caerdydd yn gartref i gymuned weithredol o fandiau pres lleol, a Band Cory yw’r band pres preswyl. Felly gallwch fanteisio ar gyfleoedd i arsylwi ar amrywiaeth o ensembles a hyd yn oed eu harwain.
• Er mwyn eich helpu i ddod yn gerddor arloesol a chyflogadwy, mae hanner eich ail flwyddyn yn ymwneud â chreu prosiectau proffesiynol. Mae’r meysydd y gallwch ganolbwyntio arnynt yn cynnwys ymchwil, addysgu, cerddoriaeth gymunedol, ymarfer creadigol cydweithredol, cyfansoddi a chelfyddyd ddigidol.
• Fel rhan o hyn, byddwch yn cwrdd yn rheolaidd â mentoriaid arbenigol, gan eich galluogi i greu rhwydwaith cadarn o gysylltiadau.
• Ar wahân i’ch hyfforddiant ymarferol, gallwch gymryd rhan mewn seminarau sy’n edrych ar elfennau allweddol o ddatblygu a chynnal gyrfa lwyddiannus – fel rhwydweithio, presenoldeb ar y cyfryngau cymdeithasol, treth a chyllid, ceisiadau am gyllid a sefydlu eich hun fel artist annibynnol.