BMus (Anrh) Cerddoriaeth – Offerynnol a Lleisiol

Mae ein cwrs cerddoriaeth blaenllaw yn eich arwain i archwilio datblygiad artistig, gyda hyfforddiant ymarferol a chyfleoedd wedi’u cysylltu’n gryf â’r diwydiannau cerddoriaeth presennol wrth galon y cwrs.

Mae perfformiadau unigol a chelfyddyd gydweithredol yn hanfodol i’ch astudiaethau ac mae’r cwrs yn cynnig cyfleoedd i ddatblygu eich sgiliau yn y Coleg ac mewn amrywiaeth o leoliadau proffesiynol a chymunedol.

Byddwch yn mireinio eich sgiliau technegol ac artistig gyda rhai o brif ymarferwyr y diwydiant, yn ogystal â chael cyfleoedd i berfformio a gweithio ar amrywiaeth o brosiectau, gan gydweithio’n aml â myfyrwyr o adrannau ar draws y Coleg – o ddisgyblaethau offerynnol/lleisiol gwahanol hyd at actio, cynllunio neu reoli llwyfan.

Gallwch arbenigo mewn unrhyw un o’r disgyblaethau hyn, sy’n cael eu galw’n ‘brif astudiaeth’:

• Pres
• Gitâr
• Telyn
• Aml-offerynnwr (chwythbrennau)
• Offerynnau taro
• Piano
• Llinynnol
• Llais
• Chwythbrennau

Fel rhan o’ch addysg bersonol, byddwch yn mwynhau gwersi unigol a gwersi grŵp, dosbarthiadau perfformio, yn ogystal â dosbarthiadau meistr gyda rhai o berfformwyr mwyaf llwyddiannus y diwydiant. Byddwch hefyd yn cymryd rhan mewn hyfforddiant corawl bob wythnos ac amrywiaeth eang o weithgareddau ensemble a cherddorfaol, wedi’u cefnogi gan fodiwlau astudiaethau proffesiynol allweddol, sydd wedi’u cynllunio’n benodol i ddatblygu pob agwedd ar eich dawn gerddorol.

P’un ai ydych chi’n offerynnwr neu’n ganwr, byddwch yn cael eich arwain gan eich tîm eich hun o athrawon rhagorol sydd â blynyddoedd o brofiad proffesiynol ac sy’n dal i fwynhau gyrfa broffesiynol weithgar. Maent yn y sefyllfa berffaith i’ch mentora a chefnogi eich dyheadau gyrfa ar bob cam, gan eich helpu i fod yn artist amryddawn, hyblyg a rhagweithiol.

• Byddwch yn cael dealltwriaeth ddofn o’r diwydiant cerddoriaeth presennol, gan ddysgu’r sgiliau a’r wybodaeth broffesiynol berthnasol sydd eu hangen arnoch i ddilyn gyrfa yn gwneud yr hyn rydych chi’n ei fwynhau.
  
• Byddwch yn cael cymysgedd o hyfforddiant grŵp ac un i un arbenigol yn eich prif faes ffocws lleisiol neu offerynnol – sef ‘prif astudiaeth’. Mae hyn yn cynnwys dosbarthiadau perfformio, ymarferion ensemble, dosbarthiadau ymarferol, gweithdai, sesiynau stiwdio, darlithoedd, seminarau, prosiectau grŵp a chyfleoedd i ennill profiad sylweddol.
  
• Byddwch yn dysgu gyda’n tîm cynhwysfawr o diwtoriaid, gan gynnwys unawdwyr offerynnol a lleisiol adnabyddus, cerddorion siambr hynod brofiadol, hyfforddwyr nodedig, cyfansoddwyr blaenllaw, arweinwyr ac artistiaid creadigol mewn amrywiaeth o genres – yn ogystal â phrif chwaraewyr mewn ensembles a cherddorfeydd mawr. Mae’r artistiaid addysgu rhagorol hyn yn cynnig addysg ac arweiniad ar y lefel uchaf, yn ogystal â mentoriaeth a chyfleoedd rhwydweithio gwerthfawr hefyd.
  
• Mae gennym berthynas agos â sefydliadau celfyddydol uchel eu parch a chwmnïau opera a cherddorfeydd byd-enwog yng Nghaerdydd a thu hwnt – ac mae rhai ohonynt yn cynnig cynlluniau profiad cyffrous sy’n agored i chi fel myfyriwr israddedig yma.
  
• Rydym yn cynnig amrywiaeth eang o fodiwlau datblygu proffesiynol dewisol i wella eich gwybodaeth a’ch dealltwriaeth o’ch llwybr tuag at eich gyrfa yn y dyfodol.
  
• Byddwch yn hyfforddi mewn cymuned greadigol gyfoethog ac amrywiol ochr yn ochr â channoedd o fyfyrwyr eraill ar draws y Coleg – gan gynnwys y rheini o wahanol adrannau drama (er enghraifft, actio, theatr gerdd, pypedau, rheolaeth yn y celfyddydau ac ati) – sydd hefyd yn awyddus i gydweithio a chreu gwaith newydd. 
  
• Mae llawer o gyfleoedd perfformio ar gael i chi fel rhan annatod o’r cwrs, ac mae llawer ohonynt yn berfformiadau cyhoeddus. Mae hyn yn cynnwys asesu eich perfformiad, a wneir fel arfer o flaen cynulleidfa, gan eich galluogi i adeiladu eich llwyfan a’ch sgiliau perfformio artistig, yn ogystal â chysylltu â gwrandawyr yn rheolaidd.
  
• Gallwch archwilio amrywiaeth eang o genres cerddorol – gan gynnwys repertoire clasurol, traddodiadol Cymreig a chyfoes – yn ogystal â chael yr wybodaeth ddiweddaraf am agweddau sy’n newid yn gyson a chyfleoedd newydd cyffrous y busnes cerddoriaeth.
• Byddwch yn cael cyfleoedd i ymgysylltu â chynulleidfaoedd amrywiol a chysylltu eich gwaith â chymunedau ledled Cymru. Gall hyn fod ar sawl ffurf, ond fel arfer mae’n cynnwys perfformiadau allanol yn y gymuned, gweithdai cerddoriaeth mewn ysgolion, gwaith addysgol a phrosiectau cymunedol eraill.
• Yn ein dosbarthiadau cerddoriaeth a chymdeithas, gallwch ddarganfod sut mae cerddoriaeth wedi cael ei defnyddio i greu newid cymdeithasol, gan ymchwilio i’r sbardunau a’r ffactorau a arweiniodd at greu repertoires amrywiol. Drwy edrych ar amrywiaeth fwy cynhwysol o gerddoriaeth, byddwch yn ymchwilio i weithiau gan artistiaid LGBTIQA+, yn ogystal â chyfansoddwyr ac artistiaid Du, Asiaidd ac ethnig amrywiol.
  
• Byddwch hefyd yn cael eich cefnogi i ddatblygu eich strategaethau personol ar gyfer dulliau gweithio moesegol a chynaliadwy, gan roi’r ymwybyddiaeth, y cwrteisi proffesiynol a’r sgiliau cyfathrebu priodol i chi ar gyfer y maes yr hoffech weithio ynddo ar ôl i chi raddio.
  
• Mae’r cwrs hwn yn ymwneud â mwy na hyfforddiant ymarferol – byddwch hefyd yn cymryd rhan mewn llwybr corfforol, emosiynol a deallusol cytbwys tuag at greu cerddoriaeth, gydag amrywiaeth o ddosbarthiadau’n cael eu cynnig mewn seicoleg perfformio, Techneg Alexander a dulliau corff a meddwl eraill.