Setlo

Pan fyddwch chi'n symud i'r DU, efallai y byddwch yn profi emosiynau amrywiol wrth i chi setlo. Mae cyfres o gamau i'r broses hon yn aml, gan ddechrau ag ymdeimlad cychwynnol o gyffro wrth i chi archwilio amgylchoedd newydd, ac wedyn heriau dros dro fel hiraethu am gartref neu wahaniaethau diwylliannol. Dros amser, wrth i chi ymgyfarwyddo a dod yn fwy hyderus yn eich amgylchoedd newydd, bydd y teimladau hyn yn troi i fod yn synnwyr o gysur a pherthyn, gan eich galluogi i gofleidio diwylliant y DU yn ogystal â'ch hunaniaeth eich hun.

Gall myfyrwyr CBCDC ymuno â chymdeithasau Prifysgol Caerdydd, sy'n cynnwys amrywiaeth o grwpiau sy'n darparu ar gyfer myfyrwyr rhyngwladol. Cewch ymuno â rhai yn rhad ac am ddim, a bydd angen talu tâl aelodaeth i ymuno ag eraill. Dyma restr lawn o'r cymdeithasau.

Mae Caerdydd a Chymru hefyd yn gartref i sawl cymdeithas ryngwladol, gan gynnwys:

• Chinese in Wales
• Cardiff Hongkongers
• Hindu Cultural Association Wales
• Nepalese Society Wales

Mae'r sefydliadau hyn yn ffordd wych i gwrdd â phobl, dathlu eich diwylliant, a chysylltu â chymunedau lleol.

Mae addasu i ddiwylliant newydd yn cymryd amser, ond mae yna ddigonedd o ffyrdd i hwyluso'r broses:

• Cadw cyswllt ag adref – Cadwch mewn cyswllt â'ch teulu a'ch ffrindiau a dewch ag ambell beth i'ch cysuro a'ch atgoffa fel lluniau neu eich hoff snac. 
• Cymryd gofal o'ch lles – Bwytewch ddiet cytbwys, gwnewch ymarfer corff, a neilltuwch amser i ymlacio. Ymunwch â chlybiau neu gymdeithasau, a dewch o hyd i grwpiau a all eich helpu i adeiladu ymdeimlad o gymuned.
• Gwneud cysylltiadau newydd – Gall cwrdd â myfyrwyr rhyngwladol eraill eich helpu i deimlo'n fwy cartrefol. Bydd rhannu profiadau a dysgu gan eraill yn helpu i hwyluso'r broses.
• Ymarfer eich sgiliau iaith – Gall siarad mewn iaith anfrodorol deimlo'n chwithig i ddechrau, ond cofiwch y bydd llawer o fyfyrwyr yn yr un sefyllfa ac yn hapus i ymarfer gyda chi. Ceisiwch ymdrochi yn y Saesneg drwy wylio rhaglenni teledu, gwrando ar bodlediadau, a dechrau sgyrsiau. Gallwch hefyd gymryd rhan yn ein cwrs 10 wythnos cyn-sesiynol i ddatblygu hyder cyn i'ch astudiaethau gychwyn.
• Gofyn am gymorth – Mae'r Coleg yn cynnig amrywiaeth o adnoddau i hybu eich lles. Os ydych yn eich chael yn anodd setlo, da chi cysylltwch â Gwasanaethau Myfyrwyr – gall siarad gyda rhywun wneud gwahaniaeth mawr.

Mae teimlo'n ansefydlog yn rhan naturiol o addasu i amgylchoedd newydd, ac nid yw'n para am byth. Drwy gofleidio'r profiad a gofyn am gymorth pan fo angen, byddwch yn teimlo'n hyderus ac yn gyfforddus yn eich amgylchoedd newydd mewn dim o dro.

I gael rhagor o wybodaeth a chyngor ar sut i deimlo'n fwy cartrefol, cymerwch olwg ar y gwefannau canlynol

• Wynebu sioc ddiwylliannol: Cyngor gan Gyngor Materion Myfyrwyr Rhyngwladol y DU (UKCISA) ar adnabod ac ymdopi â sioc ddiwylliannol
• Cyngor ymarferol i fyfyrwyr gan Save the Student ar ymdopi â hiraeth am gartref
• Blogbost gan Student Space yn cynnig cyngor i fyfyrwyr rhyngwladol ar setlo ac adeiladu cysylltiadau
• Arweiniad gan Times Higher Education: Pum cyngor i helpu myfyrwyr rhyngwladol i setlo yn eu hamgylchoedd newydd